Art & Deko by Erinda

Erinda Hoxha Veseli nga Tirana e ka nisur herët rrugën e artit. Në fillim të viteve ’90, pas përfundimit të Liceut Artistik “Jordan Misja”, ndoqi studimet në Universitetin e Arteve Tiranë, në degën “Skenografi / Kostumografi”. Me përfundimin e shkollës iu përkushtua mësimëdhënies. Për 7 vite dha mësim në lëndën e Artit Figurativ pranë Kolegjit Turk “Turgut Özal”. Me kalimin e kohës, filloi të kuptonte që nuk ndihej mjaftueshëm e përmbushur emocionalisht dhe profesionalisht. Pas shkëputjes nga mësimdhënia, punoi në biznese private dhe për një vit u angazhua në një projekt pranë ateliesë së Anila Zajmi Katanollit në Tiranë.

 

Që herët e sprovoi veten me krijimin e bizhuterive dhe aksesorëve. Elementët që e frymëzojnë vazhdojnë të mbeten flora (lulet) dhe fauna (flutura, pilivesa, bleta, etj). Më së shumti përdor materialet metal, perla, gurë natyralë dhe materiale të ndryshme tekstile. Punimet e Erindës karakterizohen nga asimetria, të cilën e përdor shpesh. Nuk do të vononte dita kur krijimet e saj t’i ‘çertifikonte’ nën brandin “Art & Deko by Erinda” dhe tashmë prej 4 vitesh punon në biznesin e saj.

 

Ideja fillestare për krijimin e “Art & Deko by Erinda” lindi si nevojë e përshtatjes së profesionit fillestar si kostumografe me kërkesat e tregut për aksesorë unikë. Kur përfundoi studimet, ajo që pritej nga një i sapodiplomuar për skenografi ishte të punonte si skenograf apo kostumograf. Por mundësitë e punësimit ishin të pakta. Profesione të tilla si Skenografia u gjendën në vështirësi, pasi vendet e punës ishin gjithmonë e më të pakta. Kështu që, si shumë ish-studentë të arteve, iu desh të bënte punë të tjera që nuk kishin lidhje me studimet që kishte kryer.

 

Megjithatë, ndryshimet e mëdha që ndodhën në ekonomi, sidomos në fushën e teknologjisë, hapën dyer të tjera dhe krijuan mundësi të reja. Nëpërmjet internetit Erinda u përditësua me proceset krijuese, materialet dhe produktet e reja. Hapjen e një dyqani fizik e konsideronte të domosdoshëm për ecurinë dhe qëndrueshmërinë e biznesit të saj. Klientët e mundshëm do të kishin mundësi të preknin, vlerësonin dhe zgjidhnin produktin që ishte më afër nevojave dhe shijeve të tyre. Paralelisht, hapi edhe ‘dyqanin’ online, ku klientë nga të gjitha anët mund të binin në kontakt me produktet e krijuara prej saj dhe të porosisnin bizhutë dhe aksesorët e dëshiruar. Fillimisht krijonte sasi të vogla produktesh të personalizuara, sipas kërkesave të klientelës. Edhe platformat facebook dhe Instagram e ndihmonin për promovimin dhe shitjen.

 

Kënaqësia që Erinda merrte nga reagimet pozitive të vajzave dhe grave që kishin blerë dhe përdornin produktet e krijuara prej saj ishte e pamasë. Kërkesat e larmishme që merrte nga klientet për krijime të personalizuara, i nxisnin ide të reja dhe e shtynin të vazhdonte të krijonte një gamë më të gjërë produktesh. Piku i kërkesave për krijimet e saj arrinte në periudhat kur kishte më shumë evente festive.

Çdo sipërmarrje ka vështirësitë e saj dhe, në mënyrë të veçantë, sipërmarrjet në këtë fushë përballen me sfida të panumërta. Sipas Erindës, sfidat janë të përditshme dhe klima e biznesit për gratë sipërmarrëse në Shqipëri nuk është e favorshme. Një sipërmarrëse si ajo është shumë e ngarkuar në përditshëmrinë e saj, që nga koha që i duhet të shpenzojë për të ideuar dhe krijuar produkte elitare dhe për t’i marketuar ato; deri tek përmbushja e detyrave si bashkëshorte, nënë, amvisë. Procesi i krijimit i kushton jo vetëm kohë, por edhe angazhim të vazhdueshëm fizik, emocional dhe mendor. Edhe procesi i sigurimit të materialeve cilësore ka vështiresitë e veta, pasi vetëm një pjesë të lëndës së parë arrin ta sigurojë në tregun vendas dhe pjesën tjetër e siguron nga jashtë vendit.

Pavarësisht vështirësive, dashuria e Erindës për punën e saj e inkurajon të mos dorëzohet dhe të ecë përpara me synimet e qarta për ta fuqizuar veten dhe sipërmarrjen që ka ngritur. Është e gatshme të përballojë çdo sfidë.

 

Megjithatë, sipërmarrësja Erinda i njeh edhe pikat e dobëta të sipërmarrjes që ka ngritur dhe drejton: mungesa e një strategjie marketingu profesional është një rrezik permament për qëndrueshmërinë e biznesit. Prandaj, në planet e saj të ardhshme është ndjekja e një kursi marketingu që do ta ndihmojë edhe të hapi faqen e web-it të sipërmarrjes “Art & Deko by Erinda”.

 

“Kjo që bëj unë sot më sjell kënaqësi dhe ndihem mirë sepse kam arritur të bëj një balancë dhe një kompromis midis të bërit art dhe të qënit në biznes. Ç’është më e rëndësishmja, unë arrij të siguroj të ardhurat e mia, duke bërë diçka që e dua.” – shprehet Erinda për Women in Business.

 

Pasi rrëfimit të historisë së saj, Erinda ka edhe një mesazh për vajzat e reja që duan të nisin një sipërmarrje:

“Ndiqni ëndrrat dhe besoni tek vetja. Asnjëherë mos ndaloni së mësuari sepse jeta është proces të nxëni.” 

Promovimi i vajzave dhe grave sipërmarrëse në këtë faqe realizohet kuadër të projektit GWES - Sinergjia për fuqizimin e vajzave dhe grave financohet nga Ambasada e Holandës në Shqipëri, në kuadër të Fondit të të Drejtave të Njeriut 2022. Projekti GWES zbatuar nga Qendra Kombëtare për Shërbimet Komunitare dhe Together for Life.