Dorina Muhaj, një artiste që qëndis në letër

Punimi i parë i saj  u frymëzua nga një pullë poste e vitit 1967, nga pullat e postës që koleksiononte bashkëshorti i saj nga Posta Shqiptare, për t’u kthyer më vonë në një sipërmarrje të mirëfilltë: “Bota magjiplotë e letrës”, një sipërmarrje që ka si fokus prodhimin e produkteve artizanale, ku më unikja është realizimi nëpërmjet letrës i kostumeve popullore.

Vendosmëria për të ngritur një biznes erdhi pikërisht në një moment kritik, kur Dorina u gjend përballë papunësisë së papritur.

Gazetare në profesion, Dorina ka zgjedhur t’i dedikohet sipërmarrjes së saj, me dëshirë të ndajë me botën pasionin për punimet artizanale dhe punën e saj.

“Bota magjiplotë e letrës” vendosi të ishte emri i biznesit të sapokrijuar, për të simbolizuar kështu lëndën e parë, morinë e pafund të ideve dhe te efektit emocional që jep procesi i krijimtarisë.

“Punimet e dori kam dashuruar që fëmijë, një dashuri e ushqyer nga mami. Gjithmonë bëja ndonjë sajim për të krijuar dhurata të veçanta. Më pëlqente dhe më pëlqen akoma shumë ndjesia që të krijon puna e dorës dhe një dhuratë për të cilën ke harxhuar kohë për ta bërë. Për disa vite kam bërë punë të ndryshme, por para dy vitesh gjërat ndryshuan, kur s’kisha më një punë. Më në fund gjeta guximin për të krijuar diçka me punimet “quilling”, arti i filigranëve ose shiritave të letrës.

Punimi më dallues dhe unik është ai i realizmit të kostumeve popullore. Ideja më erdhi nga pullat e postës që koleksiononte bashkëshorti, mbi të cilat kishte skica të kostumeve popullore të ndryshme.

E nisa me një veshje të zonës së Kukësit, nga një pullë poste e vitit 1967. U pëlqye shumë dhe s’e mendoja që do punoja sa e sa të tjera. Ky punim i realizuar me shumë, shumë dashuri po bën xhiro nëpër botë.”