Anëtarët

Pëllumbesha Ahmeti



Pëllumbesha e ka mësuar punën e dorës nga nëna e saj që fëmijë. Di t’i punojë të gjitha, por mjeshtre e vërtetë është në punimin kryq dhe me grep. Në vitet e para të demokracisë, ku varfëria ishte ulur këmbëkryq në çdo familje shqiptare, Pëllumbesha punonte me porosi për tregun grek. Shumë gra dhe vajza korçare në atë kohë qendisnin çarçafë, punonin me grep perdet dhe mbulesa tavioline, të cilat çmohesin shumë matanë kufirit. Sigurisht që të ardhurat që krijonte nga shitja e punës së dorës i vinin në ndihmë ekonomisë së brishtë të familjes Ahmeti. Vite më parë Pëllumbesha bashkë me familje erdhën në Tiranë, fëmijët u shkolluan dhe rregulluan. Pëllumbesha është në punë, por punën e dorës nuk e ka lënë për asnjë moment. Tani ajo, bashkë me të shoqin, prodhojnë varëse, vëthë dhe byzylykë modern me rruaza qelqi, një ‘profesion’ që kanë vetëm pak vite që e kanë mësuar. Ngjyrat dhe motivet e produkteve të punuara prej tyre janë të larmishme dhe njëra më e bukur se tjetra. Pëllumbesha e di se aksesorët e prodhuara me dorë janë shumë të vlerësuara jashtë vendit, por në Shqipëri e ka të vështirë të fitojë prej tyre. Megjithatë, çifti Ahmeti nuk dorëzohet. Ata i reklamojnë produketet e tyre në faqen e dedikuar në Instagram dhe po mendojnë seriozisht që të hapin edhe një dyqan të vogël.